设为首页
加入收藏
广告联系
友谊赛:南韩试验白老鼠 细味洪都拉斯
日期:2018-5-28 13:10:22
南韩试验白老鼠 细味洪都拉斯

虽然今晚南韩主场迎战洪都拉斯场友赛,将会系「太极虎」队长奇诚庸取得百顶国家队急帽嘅大日子,不过饱受伤患困扰嘅南韩,至惊系再添伤兵,打嚟难免缩手缩脚,呢啲热身波都系博入球细正路啲。

伤兵困扰唔敢冒进

试阵之馀点样能够避免增加伤兵,系南韩今仗主要目的。自从28人名单公布之后,后卫金敏在、中场权昶勳、廉基勳、前锋李根镐先后打柴,FC东京中坚张贤秀亦足踝伤久治未愈,金珍洙嘅伤势同样进展缓慢,几个星期冇练波,去唔去到俄罗斯好成疑问,三条线都有大批十字兵,令主帅申台龙头痛到呕,试出一个理想排阵系当务之急。

咁点试法呢?效力意甲维罗纳嘅20岁小将李昇右系其中一个重点,因为喺法甲迪安踢到识飞嘅权昶勳足腱撕裂要抖几个月,冇左佢,孙兴民要揾另一个攻击力强嘅队友从后支援,依家可以考虑嘅除左黄喜灿,全无A级国际赛经验嘅李昇右,都系白老鼠之一。至于入选引发争议嘅攻击中场李青龙,已经今非昔比,今季喺英超水晶宫只上阵10次,唔使旨意佢喺进攻有乜建树。更吹胀嘅系,李青龙自己知自己事,为求入到23人大军名单,同申台龙倾过转型,应承连翼卫都肯踢,佢出现喺后防会踢成点?同样系一个试验重点。

讲真,陪南韩拍跳嘅洪都拉斯气力、速度兼备,但就作战心态成疑,如果同「太极虎」斗歎慢板,呢场友赛恐怕同分队练习赛冇乜分别,足智彩仲将中位数下调至2/2.5球,照拣入球细稳阵。